Trayanggol

Baligtarin ang Tatsulok

ni Joshua Alejandro C. Diokno, UP Diliman

At ang mundo ay muling iikot
sa palad ng mga ganid;
dahil pilitin mang baligtarin ang tatsulok,
ang kakaunting makapangyarihan
ay makatutuntong sa pedestal ng ginhawang
nakapatong sa mga balikat ng higit na nakararami

Pawis ay tatagaktak
sa bugbog na katawan --
sa pagpupursiging mapakain
ang mga bibig na nakanganga.
Dugo ay dadanak
sa walang katapusang hangaring
maitaguyod ang mga karapatang
hamak na mga salita lamang.
At sa ingay ng sama-samang mga tinig
at magkakabigkis na puso,
tanging halakhak ang maisusukli ng mga nakaupo
habang lasing sa kanilang tinatamasa.

Dahil sa ang paghihirap ay bukal ng lakas,
ang pagkadala ng mga aba ang siyang magbubukas
ng impyerno
upang hilahin ang mga nakatataas
mula sa kanilang kalangitan.

Sa isang lipunang maging si Hudas ay tila kagalang-galang,
ang mangarap ay may katumbas na malaking halaga
Halagang sisingilin sa dignidad
o dili kaya'y sa sariling buhay.

[Mula sa Bagong Sibol, Pilipino Star Ngayon, 14 November 2005 issue]

==

Tatsulok. Dahil makapangyarihang mayayaman lamang ang nasa ituktok. Tatsulok. Dahil muling inaawit ni Bamboo ang dating himig ni Cabangon. Tatsulok. Dahil iyan ang tema ng bagong post ni JUN. Tatsulok. Dahil maraming naging luhaang biktima ang mga pyramid scam at MLM. Tatsulok. Para sa alaala ng "magic pyramid" ni Ernie Baron. Isama na rin natin si Johnny Midnite. At ang kanilang mga teyoriya mula sa misteryosong enerhiyang nagmumula sa Pyramid of Ginza. Tatsulok. Ang karaniwang korte ng mga talismang nabibili sa Quiapo. Tatsulok. Diyan din iniwangis ang mga mapanganib na paputok. Tatsulok. Dahil naalaala ko ang food nutrition pyramid. Tatsulok. Dahil sa mga batang tumatatse sa suluk-sulok ng mga estero. Tatsulok. Dahil iyan ang hugis ng bawat kaputol ng napakasarap na Toblerone.

Happy Chinese New Year!

Nalathala pala ang Paranormal ngayong araw na ito. Click mo here

Hindi yata gaanong angkop at naging napakakumon ng katapusan sa huling talata. Hindi ko kasi alam kung paano ko tatapusin. Bukod pa diyan ay ang limitadong espasyo. Higit 650 salita na ito ikumpara sa standard na 500.

Iyan lang po muna. May pupuntahan pa ako. Babay.

Kung Hei Fat Choi!

Collection of Prayers for the Month of Hearts

Naaaliw ako sa mga prayers sa Inquirer Libre [libreng plugging na 'to ha] lately. Ang mga sumusunod na panalanging walang initials ay mula sa "mga" editors nito. Mini-mini-mayni-mo.


Mga panalanging pang Love Notes.

Dear Joe, hehe.

[Nalathala sa Inquirer Libre.]


October 12, 2006
Lord, Mahal ko pa rin ang ex ko at nagkasundo kaming patuloy na magkita. Ngunit nararamdamang kong hindi na niya ginagalang at pinahahalagahan ang pag-ibig ko sa kanya. Bigyan Nyo po ako ng katatagan ngayong nagpasya akong tuluyan nang bumitiw sa kanya at bumuo ng panibagong buhay na hindi siya kapiling. Amen.


February 7, 2007
Lord, Malapit na nga ang Araw ng mga Puso, anlamig-lamig pa ng panahon. Lalo tuloy akong nalulungkot at wala akong katipan. Kung 'di N'yo po ako bibigyan ng lalaking iibigin ngayon, patatagin N'yo na lang po ang aking puso at isipan upang maging masaya pa rin ako sa kabila ng napakaraming magsing-irog na magdiriwang ng kanilang pagmamahalan. Amen.


February 8, 2007
Lord, Nawa'y pahintulutan Nyong makahanap ako ng magiging kabiyak ng aking puso at may bumalot sa giniginaw kong pag-ibig. Turuan Nyo pong panain ng inyong anghel ang babaeng nasaktan at hilumin ang kanyang natamong sugat. At kung Inyo pong pagbibigyan ang aking dalangin, siya ay aking iingatan at di paiiyakin. Amen. (CLD)


February 13, 2007
Lord, Nagpagawa ako ng Valentine's card sa mga mag-aaral ko upang sukatin ang kanilang kakayahan sa sining. Ngunit higit pa do'n, binigay ko ang proyekto upang magkaroon sila ng pagkakataong makapagpahayag ng kanilang pagmamahal sa sinumang kanilang pipiliing pagbigyan ng card. Nawa'y lumaki silang may pagmamahal sa kanilang mga puso para sa lahat ng iyong nilikha. Amen.


February 14, 2007
Lord, Ngayong Araw ng mga Puso, tulungan N'yo po akong huwag mahuli sa usapan namin ng kasintahan ko. Hiyang-hiya na ako sa kanya sa paghihintay nang matagal sa akin tuwing magtatagpo kami. Gawin N'yong natatangi ang araw na ito para sa kanya, paratingin N'yo po ako nang mas maaga sa kanya sapagkat iyon ang nararapat para sa kanya. Mahal na mahal ko siya.

**Panalangin Para Sa Araw Na Ito

[Nalathala sa Inquirer Libre.]

Vol.6 No.55, Monday, February 12, 2007
Lord, Matagal na kong lumayo ngunit muli’t muli siyang bumabalik sa buhay ko. Mayroon na po siyang pananagutan ngayon at ayokong makasira ng pagsasama. Naka-move on na ako at sana’y ganuon din siya. Turuan N’yo po siyang matutong ingatan at pahalagahan ang kanyang pamilya at hayaang maging masaya sa piling nila, kung paanong ako ngayo’y masaya na rin sa piling ng bagong minamahal. Amen (LGP)


======
*Blog version
**Published version: Inquirer Libre, pahina 1, Pebrero 12, 2007, Pilipinas

Ang Pagiging Babae, Ang Maging Babae

Kaunting update muna sa blog. Nasa sidebar sa kanan, may mga SIMPLE pong personal na kuwentong isinulat ko ang nalathala sa ilang babasahin. Na-scan ko ang iba. May mga nadagdag din sa links (Tourist Spots). At drop-down menu na rin nga pala ang archives ko. Thanks.

May ilan na rin akong natanggap (at sinagot) na email na humihingi ng copy ng "Ang Pagiging Babae..." ni Bb. Josephine Barrios.  Dahil nga sa pag-quote ko sa bahagi ng tulang iyon.  Nitong huli, estudyante ng La Salle-Dasmarinas.  [Nagpakilala siya sa akin sa pangalan at apelyidong kung babasahing mabuti ay napuna kong nirambol mula sa Barrios.] Wala raw kasi silang mahanapan.  Sinearch ko sa google.  Wala nga talaga.  Kaya heto, ibabahagi ko na rin sa inyo.

 

 

Ang Pagiging Babae ay Pamumuhay sa Panahon ng Digma

                        ni Joi Barrios

 

Ang pagiging babae

ay pamumuhay

sa panahon ng digma

Kapiling ko sa aking paglaki

ang pangamba

hindi ko tiyak ang bukas na laging nakakawing

sa mga lalaki ng aking buhay;

ama, kapatid,

asawa, anak.

Kinatatakutan ko ang pag-iisa.

 

Sa pagiging ina,

kaharap ko'y tagsalat.

Pagkat ang lupit ng digmaan

ay hindi lamang paggulong ng mga ulo

pagguhit ng espada,

kundi unti-unting pagkaubos

ng pagkain sa hapag.

ay, paano magpapasuso ng bunso

habang naghahanap ng maisusubo sa panganay?

 

Walang sandaling walang panganib.

Sa lansangan,

ang paglakad sa gabi'y

pagtukso sa kapahamakan.

Sa sariling tahanan,

ang pagsagot at pagsuwa'y

ay pag-aanyaya ng karahasan.

 

Kaytagal kong pinag-aralan

ang puno't dulo

nitong digmaan.

Sa huli'y naunawaan kong

ang pagiging babae

ay walang katapusang pakikibaka

para mabuhay at maging malaya.

 

-----

Ang ganda 'di ba?

 

Ito naman ang isa pang tula sa ibaba.  Bilang mambabasa,  nalilibang ako sa mga pagpapalitan tugon ng mga hinahangaang makata. 

 

Sa tulang "Ang Maging Babae" ni Ruth Elynia Mabanglo ay may line na ganito - "kasumpa-sumpa ang maging babae sa panahong ito".  Na binigyan namang tugon ni Santiago.

 

 

Isang Tugon kay Elynia: Ang Pagiging Babae

ni Lilia Quindoza Santiago
(Asintada -UP Press, 1997)

Ayaw kong isumpa ang pagiging babae
Sa panahong ito, kabarong makata,
Kahit pa sugatan ang lahat ng sulok
Ng puso ko't kaluluwa.
Ayaw kong isuko ang kayariang
Ako rin ang bumubuo.
Di ko ipamimigay
Ang mumunting butil ng diwang
Ako rin ang bumubuhay.

Totoong "kasumpa-sumpa
ang maging babae sa panahong ito"
Kung panatag nating aakuin
Ang hinulmang pagkatao
Sa mga nagdaang siglo
Nang walang pagtangi sa sarili
O walang pagsalungat sa pang-aapi.

Ngunit sa ganang akin
Ang pagkababae'y marami pang kahulugan
Bukod sa pagtutol sa kostumbre't kaugalian
Ang pagiging babae'y pagkatha
Ng mga tulang di pa nalilikha;
Ang pagiging babae'y pag-awit
Ng di pa naririnig
Ang pagiging babae'y pagtuklas
Ng daigdig na di pa natutuklasan,
Ang pagiging babae'y paghubog
Ng mundong di pa nabubuo
Ang pagiging babae'y pagluwal
Ng buhay na di pa nararanasan.

Ngunit higit sa lahat, ang pagiging babae'y
Higit pa sa lahat ng ito
Na tayong kababaihan lamang bilang tao
Ang tanging makakatanto.

 

 

Congratulations, You Have Won!!!!!!!!!

Kung susumahin ko lang lahat ng araw-araw at maya't maya kong pagkapanalo ng milyun- milyong dolyar sa loterya, hindi na magkakalayo ang estado namin sa buhay ni Bill Gates. Ubod naman ako ng swerte at bukod doon ay palagi pa kong napapamanahan ng napakalaking halaga. Isama mo pa diyan, hindi naman sa pagmamalaki, isang karangalan na ako pa ang palaging napipiling pagkatiwalaan ng milyun-milyong dolyar na halaga ng mga ari-arian ng Ministro ng Bolkiah, ng Sultan ng Africa, ng hari ng tralala, o ha?

Perwisyong mga spam mails 'to!! Sari-saring istratehiya na ang ginamit ko para salain ang mga 'to pirming nakakalusot pa din sa inbox ko. Pag tsek ko pa naman parati akala ko me importante.

Please naman, parang awa nyo na, hindi ko na alam kung paano ko pa malulustay lahat ng salaping ito. Sobra-sobrang biyaya na ang natatanggap ko mula sa inyo. Manong bahaginan nyo naman ang iba.

At eto pa ha, palagi na lang akong kinukulit bentahan ng viagra at penis enlarger. Buset!! Hanggang kelan kaya nila mare-realize na kahit pa'nong tambling ang gawin nila e hindi sila makakabenta sa 'kin. WA-LA A-KONG PEEEEE-NIS!!! [Bigkasin ng marahan at mariin. Imadyinin si Ate Guy habang dinideliver yung linya niyang "MY-BRO-THER-IS-NOT-A-PIG!!"]

Paranormal (Part 3)

...para sa isang napakahaba at masakit na proseso ng kamatayan.


Inihanap ko ito ng medikal na eksplanasyon. Maaaring may kahinaan ang aking puso. Nagigising at nagpa-function na ang aking utak ngunit mabagal ang response ng aking puso kaya hindi agad makagalaw ang pisikal kong katawan. Puwede.

Ewan nga ba’t ang naging resulta ng aking masidhing pagsasaliksik ay pawang mga tumutukoy sa astral projections at iba pang diskusyon mula sa mga spirit questors. Na may dahilan daw ang pagpaparamdam, pagpapakita o magkaminsa’y pagdukot sa iyo ng isang nilalang mula sa ibang dimensiyon. Sila raw marahil ay nangangailangan ng tulong.

Ibig kong makatulong sa aking kapwa, ngunit higit kong nanaisin na matulungan ang kapwa ko buhay kaysa mga taong patay. May mga taong sadyang nakalaan para doon. At hindi ako iyon.

Hindi ko minsan mang kinainggitan ang mga taong may “third eye” o may mga matang nakakakita ng higit pa sa nakikita ng karaniwang nilalang.

Hindi ko pinangarap na makakita pa ng mga multo o kaya UFO. Ng tikbalang, duwende, white lady o mga taong pugot.

Utang na loob, ayoko...


-muling itutuloy para sa pagwawakas-

Paranormal (Part 2)

Installment plan na yata ito. Ewan kung kailan ko matatapos.

Nakaraan:

...Inaasahang sa gayon ay hindi ako magagawang dalawing muli ng bangungot at ng maliliit na nilalang sa aking panaginip.



Sa pagpapatuloy:

Nuong mas bata pa ako, ang sabi ng aking ina ay kailangan kong piliting gumalaw kapag ako’y nasa ganoong sitwasyon. Dahil kung hindi ay magtutuloy-tuloy daw ito hanggang sa hindi na ako muli pang magising.

Kung minsan iniisip kong parang gusto na yata ako talagang kunin ni God. Tuwing dumarating ang mga pagkakataong iyon ay nawiwika ko sa sariling- “ito na siguro”. Lalo na nuong dumating sa puntong hindi ko na talaga magawa pang makahinga.

Alam kong lahat sa atin ay nakaranas na ng ganitong uri ng panaginip subalit ang paulit-ulit at sunud-sunod na gabi ng lagim, este bangungot, sa loob ng ilang buwan ay hindi na yata pangkaraniwan.

Hindi ako takot mamatay. Hindi iilang ulit na napagdesisyunan kong huwag nang labanan ang kamatayan. Ano nga ba naman ang pagkakaiba ng bangungot sa pagtulog gayong minsa’y tila isang bangungot din ang mabuhay.

Hiniling ko na nga rin sa Diyos na kung kukuhanin na niya ako’y sa ganito na lamang na paraan. Maikli. Payapa. Masyado kasing mahina ang aking loob, pati na ang katawan para sa isang napakahaba at masakit na proseso ng kamatayan...



-itutuloy ulit-

Balik ka bukas.

Paranormal

Tatlong buwan. Sa loob ng halos tatlong buwan ay gabi-gabi akong dinadalaw ng isang bangungot. Sa mga panahong iyon ay mabilis na nanlalim at nangitim ang paligid ng aking mga mata.

Sleep paralysis. Gising na ang aking diwa ngunit wala akong kontrol sa katawan. Alam kong ako’y nasa loob lamang ng isang panaginip ngunit hindi ko maigalaw maging ang dulo man lang ng aking daliri.

Isang maikling panaginip na malimit ay hindi ko maalala sa muli kong paggising. Kung ano ang naganap at kung saan ako nakarating. Sadyang napakahirap. Kadalasa’y inaantay kong halos mag-uumaga na bago ko ipikit ang aking mga mata. Inaasahang sa gayon ay hindi ako magagawang dalawing muli ng bangungot at ng maliliit na nilalang sa aking panaginip.

itutuloy...

**Panalangin 2

[Unang nalathala sa Inquirer Libre.]

02 Pebrero, 2007 (Vol.6 No. 49)

Lord, Nadukutan po ako kanina. Tangay ng magnanakaw ang kakaunti ko na ngang natitirang pera. ’Di ko alam kung wala lang siyang maipakain sa kanyang pamilya o ipambibili lang niya iyon ng droga. Paglinawin mo po sana ang kanyang isip, na mali ang ginagawa niya, at tulungang maiayos ang buhay niya para wala na siyang muli pang maging biktima.(LGP)





==========
*Blog version
**Published version: Inquirer Libre, pahina 1, Pilipinas

**Panalangin

Ito 'yung ilan sa mga panalangin kong nalathala sa Inquirer Libre.

[Unang nalathala sa Inquirer Libre.]

Enero 18, Huwebes, taong 2007
Lord, magulo man ang bayan ko, turuan Nyo po akong patuloy na mahalin ito. Lugmok man sa kahirapan at sunud-sunod na sigwa, nawa'y hindi sumagi mang minsan sa isip ko ang sumuko. Patatagin po ninyo ang aking loob, sampu ng mga kababayan ko. Amen (LGP)


Enero 30, Martes, taong 2007
Lord, salamat po sa kape at pandesal kaninang umaga. Pati na rin po sa isda, kanin at mainit na sabaw sa tanghalian ko kanina. At salamat din po sa kung anuman ang pagkaing aabutan ko sa aming hapag paguwi ko mamya. Amen (LGP)


At ang panalangin sa araw na ito ay -

Pebrero 1, Huwebes, taong 2007
Lord, sa darating na Araw ng mga Puso, tulungan Nyo po akong makapili ng tapat na kasuyo. Ayoko na po ng taksil at mga bohemyo. Isang sign lang naman po mula sa inyo ang kailangan ko. Maraming salamat po kung mapagbibigyan Nyo ko. Amen. (LGP)



Seryoso 'yung una. Pangmasa ang ikalawa. Iyong ikatlo, nagpapatawa na yata ako. Malay ko tinamaan ka din diyan sa dasal ko. Marami bang nakaka-relate? :)



============
*Blog version
**Published version: Inquirer Libre, pahina 1, Pilipinas

Interbranch Deposits

According to the Customer Service Representative over the phone, Bank of the Philippine Islands (BPI) will no longer charge its depositors a hundred pesos (Php100) for provincial interbranch deposits starting January 2 of the current year. Good news, thanks.

On the contrary, a new post in their website announces the bank's service fees including provincial interbranch deposits as of January 7. BPI should clear things up, i suppose.

Blogger

I'm having a hard time opening blogger.com lately. That is, since the time i switched from beta version. I don't know if it's just my PC or my dial up connection sucks. Or maybe, just maybe, some part of Asian countries are still affected by the recent earthquake in Taiwan. I just hope everything will be fine soon. Go, go, go, fellow bloggers!

Langgam: Isang Muling Pagsulyap

Ang orihinal na sipi ng tulang langgam.


Ang tula ng langgam ay bahagi ng sanaysay (personal essay) na entry ko sa Bagong Sibol, PSN at nalathala nitong nagdaang Disyembre- Pindutin dito

Kani-kanina lang ay di-sinasadyang nakita ko ang sipi ng tulang isinulat ng aking ama na ginagamit ng isang nagngangalang A*** B*********.

a***
Posted 26/12/2006

ANG KAWAWANG LANGGAM

Ito’y isang aral na di dapat isalimot
Ng mumunting langgam na sakdal sa likot
Huwag lang mangangahas na pumasok-pasok
Sa alinmang butas, siwang na makipot
Salot di ninyo alam ay pasikut-sikot
Baka mapahamak di ko sinasagot
Ang iwi nyong buhay sa mundong magusot

Pagka’t isang araw ay mayrong naligaw
Na kabaro nyong langgam na ubod ng yabang
Sa singit ng dilag na tamad magbanlaw
Naipit ang diaskeng di po nakasigaw
Sa bukso ng angot ay dagling nangisay
Itong pobreng langgam duleng pong namatay

At kayong mga readers o miron kong irog
Huwag magagalit o matuwang lubos
Pagka’t itoy kapiraso lang ng diwang maharot
Ng diablong makatang may kambal na utot

SANA’Y WALANG MAGNAKAW
NITONG AKING TULA
PAGKA’T AKO’Y NANINIWALA
NA MABISA ANG KARMA

FROM: XyloAcT's Lead Guitarist
A*** D. B********

[note: walang pamagat ang orihinal na tula, nilagyan niya. 'yung magusod naging magusot at iyong kapritso ay naging kapiraso sa kanyang post.]

Ang huling apat na linya sa huling saknong ay hindi parte ng tulang ito ngunit natatawa akong nagawa pa niyang idagdag in bold letters. Hala, inangkin na! Magnakaw at Karma. Hmmnnn...Look who's talking?

Ayos lang naman kung walang nailagay na pangalan ng may akda o kaya ay source. Madalas iyang mangyari. Ngunit ang angkinin pa ang gawa ng iba ay kalabisan na at ito'y nakasasama ng loob.

Another Option

Have you heard of Cozy Reads Publishing? The one which publishes love stories? No, they don't need your heartbreak chuva story anymore but now accept entries for their third anthology which is the Match-made collection. The ups and downs and roundabouts of relationships, they say. They pay in peso. Check it out - www.cozyreads.blogspot.com.

Hear Ye!

Do you want your story be published in an interactive story blog owned by two established journalists? They even pay for each published piece. From a hundred to a thousand dollars, mind you. Such a nice site, I've been reading the blogs for quite some time now. Visit them at www.commonties.com.

**Ang Kuwento ng Langgam (Sa Pagpapatuloy)

[Unang nalathala sa Bagong Sibol column ng Pilipino Star Ngayon.]


Ang Kuwento ng Langgam

ni Maria Cristina Falls

Ako yung taong may malaking galit sa mga langgam. Kung alam nyo lang ang pinsalang naiambag at patuloy nilang iniaambag sa buhay ko. Kaya sana, hinihingi ko ang inyong pang-unawa. Kung kabilang nga lamang sila sa mga maaaring isuplong, mahigpit kong tututulan ang pagbasura ng Pangulo sa pagpapataw ng parusang kamatayan. Dahil diyan, madalas ay napipilitan na lamang akong ilagay ang batas sa aking mga kamay.


Matagal-tagal ko na rin naman silang inoobserbahan. Sama-sama sila kung gumawa. Pinaghahandaan nila ang pagdating ng tagulan. Ang totoo niyan, marami rin akong natutunan sa panahong ginugol ko sa pagsubaybay sa paraan ng pamumuhay ng mga langgam. Hinangaan ko ang kanilang kasipagan at katapatan (loyalty).


Hindi alintana ng manggagawang langgam ang nakaambang panganib sa labas maprotektahan lamang ang kanilang reyna at makapag-ipon ng pagkain para sa kanilang kolonya. Tila wala silang kapaguran sa napakahabang linyang kanilang binabaybay.


Bagamat may natuklasan akong hindi kasiya-siya. At sigurado ako, isa sa aking mga sentimyento ay katulad ng sa inyo.

Naranasan n'yo na bang masiraan ng kompyuter dahil sa mga langgam? Nagkabutas-butas na rin ba yung tsinelas n'yo sa may hagdan?


Ako, OO.


Dalawang beses na akong nagpalit ng floppy drive dahil ginawa nila itong imbakan ng pagkain. Kamakailan lang ay kinailangan ko pang bumili ng bagong AVR dahil muli nilang ginawang hideout ang loob nito. Nasira ang IC at ayaw nang magpower. Isang linggo ko ring hindi nagamit ang PC ko.


Hindi rin isang eksaherasyon na sabihing naging polka dot ang ilang sandals ko at sapatos. Mabuti na lamang at nagawa ko pang maisalba sa kamay ng mga barbarong langgam ang pinakamamahal at pinakaiingatan kong Islander (original kasi, hehe). Ginagawa kasi nilang meryenda ang mga sandals na de goma kapag pinagsawaan na nila ang bigas, tinapay at mga pakete ng pansit.


Maraming beses na rin kaming sinaklolohan ng isang electrician sa tuwing mapipili ng mga langgam na ganapin ang kanilang general assembly sa isa sa aming mga electrical switch, dahilan kung bakit hindi na ito mapindot. At pihadong isang miting de avance na naman ang sikretong nagaganap sa likod ng mga wall clock kapag hindi na naman tumatakbo ang mga kamay nito. Nakalipat na kami ng tirahan ay nauulit din ang mga ganoong insidente.


Kapag ginuhitan ko naman ng "magic chalk" ang kanilang dinaraanan ay lalo lamang silang mag-aalsa, bubuo ng barikada, ng isang tila rebolusyong katulad ng sa Edsa. Maya-maya lang ay makikita kong may bago na silang linya.


Malinis naman kami sa bahay. Higit pa nga siguro sa antas ng kalidad ng ilan. May nakapagpayo pa nga sa akin na gamitan ng vacuum cleaner. Ganuon daw ang kanilang ginagawa.


Kung minsan, kung puwede nga lang, gusto ko silang pakiusapan na huwag na sila mangalap ng pagkain. Ako na mismo ang magrarasyon ng kanilang kakainin kada buwan - sapat para sa kanila sa loob ng tatlumpung araw. Gaano na lamang ang ilang pirasong pandesal. O di kaya'y isang garapong asukal. Huwag lamang silang manira sa aking mga gamit, huwag lamang nila akong pangunahan sa pagkain.


Pero hindi. Mukhang hindi sila nakukuha sa pakiusap.


Yaman din lamang at hindi sila pumapayag sa areglo, insect spray lang ang siyang nalalaman kong katapat nila. Kaya lang, para yatang ako lang ang nahihilo sa amoy nito at hindi sila. Pagkalipas ng ilang minuto, makikita mo't naroon silang muli.


Hindi ko alam kung sapat na ang mga dahilan kong iyon para ituring silang pinakamahigpit kong kalaban. Bukod kasi sa inaagawan nila ako ng pagkain at sinisira ang aking mga gamit, nagagawa pa nila akong kagatin. At tunay namang ang kagat ng langgam ay napakasakit!


Totoong hindi matatawaran ang ehemplo ng kasipagan ng mga langgam. Ang pag-iipon sa panahon ng tag-araw para sa pagdating ng tag-ulan. Hindi ko hangad na sirain ang magandang imaheng ito sa ating lipunan. Pero sana, hindi tulad ng mga langgam, ang pagiging masipag ng isang tao dala ng paghahangad na umunlad ay palaging may kaakibat na responsibilidad. Responsibilidad na mapaunlad ang sarili kasabay ng paglago ng iba. Hindi nakakatapak, hindi nakakasagasa, hindi nakakapinsala.



------------
*Blog version
**Published version: "Ang Kuwento ng Langgam" Bagong Sibol, Pilipino Star Ngayon, January 1, 2007

E-gold

Tayo ngayon ay nabubuhay sa birtuwal na mundo. Email, e-card, chat, cyberlove, tamagotchi, RPG, lahat 'yan birtuwal. Birtuwal na sulat, kard, kausap, pag-ibig, alagang hayop, pakikipag-laban. Pati nga ang pagmamay-ari ng ginto ngayon ay nagagawa nang birtuwal. Sa ngayon ay nasa pag-iingat ng e-gold ang kapiraso kong pag-aari ng ginto. Hehe.

Actually, tunay na ginto ang iniimbak sa e-gold, pero dahil hindi mo naman materyal na nahahawakan at nasa pag-iingat ng iba, birtuwal pa rin. Bibili ka ng ginto sa e-gold through e-gold exchangers. Marami iyan. Babayaran mo sila ng dolyar sa katumbas na halaga ng gramo ng gintong nais mong bilhin. O di kaya'y ikaw naman ang mgpapalit sa kanila ng iyong ginto into peso. Ito ang ginagamit na medium ngayon sa pangangalakal over the internet . Marami na rin sa merkado ang tumatanggap ng iyong kabayaran gamit lamang ang iyong e-gold account.